- សេចក្ដីលម្អិត
- Daily Realty Group
- 05 ឧសភា 2020
- 3650
ព័ត៌មានលម្អិត
លំនៅឋានតម្លៃសមរម្យលើកដំបូងនៅកម្ពុជា ត្រូវបានប្រគល់ឲ្យអតិថិជនជាផ្លូវការ
|
||
សំណង់លំនៅឋានតម្លៃសមរម្យដែលត្រូវបានប្រគល់ឲ្យដល់អតិថិជនជាផ្លូវការកាលពីថ្ងៃព្រហស្បតិ៍ម្សិលមិញ។ រូបថត សហការី |
||
|
ភ្នំពេញៈ លំនៅឋានតម្លៃសមរម្យចំនួន ៦៨០ ខ្នងក្នុងចំណោមលំនៅឋានសរុប ២ ៤៥៧ ខ្នងដែលអភិវឌ្ឍដោយក្រុមហ៊ុន WorldBridge Homes Co.,Ltd ស្ថិតនៅក្រុងតាខ្មៅ ខេត្តកណ្តាលត្រូវបានប្រគល់ជូនអតិថិជនជាផ្លូវការហើយកាលពីថ្ងៃម្សិលមិញ ខណៈតាមផែនការគម្រោងទាំងមូលនឹងត្រូវបញ្ចប់នៅចុងឆ្នាំនេះ ឬដើមឆ្នាំ ២០២១ ខាងមុខ។ គម្រោងនេះបានចាប់ផ្តើមសាងសង់កាលពីអំឡុងដើមឆ្នាំ ២០១៧ លើផ្ទៃដី ២៣ ហិកតាក្រោមទុនវិនិយោគប្រមាណ ៧៣ លានដុល្លាររបស់ក្រុមហ៊ុន WorldBridge Homes Co.,Ltd ដែលជាបុត្រសម្ព័ន្ធរបស់ក្រុមហ៊ុន Worldbridge Group។ លំនៅឋាននៅក្នុងគម្រោងនេះមានតម្លៃចាប់ពី ២៥ ០០០ ដុល្លារដល់ ៣០ ០០០ ដុល្លារ។ |
||
ពិធីប្រគល់លំនៅឋានតម្លៃសមរម្យដែលមានការចូលរួមពីលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ព្រមជាមួយនឹងថ្នាក់ដឹកនាំរដ្ឋាភិបាល និងក្រុមហ៊ុននោះទទួលបាននូវការសាទរយ៉ាងច្រើន។
យោងតាមសេចក្តីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និងសំណង់បានឲ្យដឹងថា ការប្រគល់លំនៅឋានតម្លៃសមរម្យអនុវត្តនេះគឺតាមគោលនយោបាយជាតិស្តីពីលំនៅឋាន និងគោលនយោបាយស្តីពីការលើកទឹកចិត្ត និងការបង្កើតកម្មវិធីជាតិសម្រាប់ការអភិវឌ្ឍលំនៅឋានតម្លៃសមរម្យរបស់រាជរដ្ឋាភិបាលក្នុងគោលដៅផ្តល់ឱកាសជូនប្រជាជនទូទាំងប្រទេសមានលំនៅឋានសមរម្យអាចរស់នៅបានប្រកបដោយផាសុកភាព សុវត្ថិភាព និងសេចក្តីថ្លៃថ្នូរជាពិសេសប្រជាពលរដ្ឋ ដែលមានប្រាក់ចំណូលមធ្យម ប្រាក់ចំណូលទាប និងជនងាយរងគ្រោះ។
អ្នកស្រី កែវ ធឿន ដែលទើបទទួលលំនៅឋានតម្លៃសមរម្យ ១ ខ្នងពីក្រុមហ៊ុន WorldBridge Homes Co.,Ltd បានប្រាប់ក្រុមអ្នកយកព័ត៌មានថា ក្រុមគ្រួសារអ្នកស្រីបានចូលលុយគ្នាទិញផ្ទះបង់រំលស់ក្នុងគម្រោងនេះជាង ២ ឆ្នាំមកហើយដោយក្នុង ១ ខែត្រូវបង់ប្រាក់ ២៨១ ដុល្លារ ខណៈបច្ចុប្បន្នអ្នកស្រី និងក្រុមគ្រួសារកំពុងជួលផ្ទះគេស្នាក់នៅក្នុងតម្លៃ ១៥០ ដុល្លារក្នុង ១ ខែ។
ជាអតីតយោធាក្នុងខេត្តពោធិសាតិ៍ដែលត្រូវគេកាត់រំសាយនាពេលកន្លងមក អ្នកស្រី កែវ ធឿន បានបន្តថាបើទោះជាក្រុមគ្រួសារមិនមានប្រាក់ចំណូលច្រើន តែអ្នកស្រីពិតជាចង់មានផ្ទះផ្ទាល់ខ្លួន និងអាចបើកលក់អ្វីបន្តិចបន្តួចនៅផ្ទះ។ អ្នកស្រីនិយាយថា៖ «ខ្ញុំពិតជារីករាយណាស់ដែលមានផ្ទះផ្ទាល់ខ្លួនឯង ខណៈការបង់ប្រាក់ក៏មិនលំបាកខ្លាំងសម្រាប់ក្រុមគ្រួសារខ្ញុំនោះទេ»។
លោក សំ សុខនឿន អគ្គនាយកក្រុមហ៊ុនអចលនទ្រព្យ KW សែនសុខ និងជាប្រធានក្រុមហ៊ុន SAM SN Realty បានប្រាប់ភ្នំពេញប៉ុស្តិ៍កាលពីថ្ងៃព្រហស្បតិ៍ថា លំនៅឋានតម្លៃសមរម្យកំពុងមានតម្រូវការយ៉ាងច្រើននៅតំបន់ជាយក្រុងភ្នំពេញដែលជាកន្លែងមានមនុស្សជាច្រើន ពិសេសក្រុមកម្មករកំពុងរស់នៅ។ លោកបន្តថា ប្រសិនបើការអភិវឌ្ឍលំនៅឋានតម្លៃសមរម្យកើតឡើងនៅគ្រប់ទិសនាតំបន់ជាយរាជធានីភ្នំពេញនោះ គឺជាការប្រសើរណាស់ ព្រោះវានឹងបង្កើនលទ្ធភាពកាន់តែច្រើនដល់អ្នកដែលមានចំណូលតិច និងមធ្យម អាចមានលំនៅឋានផ្ទាល់ខ្លួនរស់នៅ។
លោកថ្លែងថា៖ «អ្នកធ្វើចំណាកស្រុកមកធ្វើការងារ និងសិក្សានៅភ្នំពេញមានចំនួនច្រើន ហេតុនេះតម្រូវការលំនៅឋានតម្លៃសមរម្យក៏មានចំនួនច្រើនទៅតាមនោះដែរ»។
ទោះយ៉ាងណាលោក សុខនឿន បានអះអាងថា សម្រាប់តម្លៃលំនៅឋានតម្លៃសមរម្យដែលកំពុងដាក់លក់នៅតំបន់ជាយក្រុងភ្នំពេញនាពេលនេះ វាហាក់ខ្ពស់លើសពីសមត្ថភាពរបស់ប្រជាជនមានប្រាក់ចំណូលទាប និងមធ្យមដែលចំណូលរបស់ពួកគាត់ត្រូវបែងចែកសម្រាប់ការចំណាយលើថ្លៃម្ហូបអាហារ និងវត្ថុប្រើប្រាស់មួយចំនួន។
លោកបន្តថា៖ «ខ្ញុំគិតថាប្រសិនបើក្រុមហ៊ុនវិនិយោគអាចសង់លំនៅឋានតម្លៃសមរម្យដែលមានតម្លៃចន្លោះពី ១៥ ០០០-២០ ០០០ ដុល្លារបាននោះនឹងមានតម្រូវការច្រើនខ្លាំងណាស់ ព្រោះតម្លៃនេះអាចឲ្យអ្នកដែលមានចំណូលមធ្យមលៃលកប្រាក់មួយចំនួនសម្រាប់បង់រំលស់ឲ្យក្រុមហ៊ុនវិនិយោគបាន»។
បើតាមលោក សុខនឿន ដើម្បីជំរុញឲ្យមានក្រុមហ៊ុនវិនិយោគលើការអភិវឌ្ឍលំនៅឋានតម្លៃសមរម្យកាន់តែច្រើនគឺត្រូវមានការចូលរួមសហការឲ្យបានកាន់តែខ្លាំងបន្ថែមទៀតរវាងក្រុមហ៊ុនវិនិយោគជាមួយរដ្ឋាភិបាលដោយក្នុងករណីចាំបាច់រដ្ឋអាចប្រើប្រាស់ដីជាទ្រព្យសម្បត្តិរដ្ឋ ដើម្បីផ្តល់សិទ្ធិឲ្យក្រុមហ៊ុនយកទៅវិនិយោគ និងលក់ក្នុងតម្លៃថោកជាងពេលនេះ។
របាយការណ៍ក្រសួងរៀបចំដែនដី នគរូបនីយកម្ម និងសំណង់បានឲ្យដឹងថា រហូតមកដល់ពេលនេះនៅកម្ពុជាមានគម្រោងអភិវឌ្ឍន៍លំនៅឋានតម្លៃសមរម្យចំនួន ៥ ដែលស្មើនឹងបន្ទប់ស្នាក់នៅសរុប ៨ ៣៣១ ខ្នងផ្ទះ និងចំនួន ៧ ២៥៦ យូនីត៕
Source From: ភ្នំពេញប៉ុស្តិ៍
